Informatika eta Komunikazioetako lehen mailako ikasleek erronka berezi eta zirraragarri bati egin diote aurre: ordenagailu bat diseinatu eta muntatzea, baina karkasarik gabe. Osagai guztiak bistara lan egiteak aukera paregabea eman die teknologiaren “bihotza” zuzenean ezagutzeko.
Erronkaren helburua ez zen PC bat martxan jartzea soilik. Ikasleek teknikari baten logika jarraitu behar izan dute: diseinua planifikatu, osagai egokiak aukeratu, kableaketa antolatu eta tenperaturak kontrolatu. Osagaiak biluzik ikusteak teoria ukigarri bihurtzen du eta hardwarearen funtzionamendua modu intuitiboan ulertzen laguntzen du.
Prozesuan zehar, talde-lanean aritu dira, konfigurazio desberdinak alderatu dituzte eta benetako arazoak konpontzen ikasi dute. Azkenean, beraiek sortutako ordenagailu erabat funtzionalak lortu dituzte, ikasgelatik kanpoko lan-egoeretara gerturatzen dituen esperientzia praktiko baten emaitza.
Martutene Lanbide Eskolan erronka praktikoen aldeko apustua egiten jarraitzen dugu, ikasleen jakin-mina eta sormena sustatzen duten proiektuak eskainiz. Teknologiaren munduan ere badago irudimenerako tartea, eta erronka honek ederki erakutsi du.
