Martutene Lanbide Eskolan badakigu ikaskuntza gelatik kanpo ere gertatzen dela. Esperientziak partekatzea, elkarbizitza lantzea eta inguruneaz gozatzea hezkuntzaren parte dira.
Gaur egun berezia izan dugu Leitzaran bailarara egindako irteeran.
Goizean mendiko ibilaldiaz gozatu dugu, paisaia ederraz eta taldean egoteko aukeraz. Eguneroko errutinatik ateratzeko eta elkarrekin beste modu batean bizitzeko aukera izan da.
Eguneko unerik berezienetako bat Leitzarango mila eskailerak igotzea izan da. Ia mila hormigoizko maila dira, 200 metro inguruko desnibela gainditzen dutenak, bailarako zentral hidroelektrikoarekin lotuta eraiki zirenak eta gaur egun Leitzarango txokorik ezagunenetako bat direnak.
Igoerak ahalegina eta iraunkortasuna eskatu ditu, baina baita elkarri laguntzea eta talde bezala aurrera egitea ere.
Ondoren, eta eguraldi ona aprobetxatuz, ibaian bainatzeko aukera izan dugu, egunari amaiera bikaina emanez.
Horrelako jarduerak oso garrantzitsuak dira Donostiako Oinarrizko Lanbide Heziketan, elkarbizitza, autonomia eta ongizate emozionala indartzen laguntzen dutelako.
Martutene Lanbide Eskolan ingurunearekin lotutako hezkuntza hurbil eta praktikoaren alde egiten jarraitzen dugu.
